Tag Archive | forgiveness

ആശാരി (Carpenter)

14.

മൂല്യം: ശരിയായ പ്രവർത്തി … … … ഉപമൂല്യം: ഒരുമ

ഒരിക്കൽ ഒരിടത്ത് അടുത്തടുത്ത കൃഷിയിടങ്ങളിൽ താമസിക്കുന്ന സഹോദരന്മാർ തമ്മിൽ ഒരു തർക്കമുണ്ടായി. ഇത് നാൽപത് വർഷത്തിനിടക്ക് ആദ്യമായി ഉണ്ടായ തർക്കമായിരുന്നു. അതുവരെ അവർ ഒരുമിച്ച് അടുത്തടുത്ത കൃഷിയിടങ്ങളിൽ കൃഷി ചെയ്തു വരികയായിരുന്നു. ജോലിക്കാരെയും കൃഷിക്ക് ആവശ്യമായ ഉപകരണങ്ങളും വിത്തും വളവും എല്ലാം അവർ പരസ്പരം കൈമാറിയിരുന്നു. പെട്ടന്നാണ് ആ ഒത്തൊരുമ ഇല്ലാതെ ആയത്. ഒരു ചെറിയ തെറ്റിദ്ധാരണയുടെ പേരിൽ അവർ പിരിഞ്ഞു; പിന്നീടു അതു വാക്ക് തർക്കമായി മാറുകയും, ആഴ്ചകളോളം അവർ തമ്മിൽ മിണ്ടാതാവുകയും ചെയ്തു.

ഒരു സുപ്രഭാത്തിൽ ജോണ് എന്ന മൂത്ത സഹോദരൻറെ വാതിലിൽ ആരോ മുട്ടി. അദ്ദേഹം വാതിൽ തുറന്നു നോക്കിയപ്പോൾ പണി ആയുധങ്ങളുമായി നിൽക്കുന്ന ഒരു ആശാരിയെ കണ്ടു.
അയാൾ പറഞ്ഞു. “ഞാൻ ജോലി തേടി വന്നതാണ്, നിങ്ങൾക്ക് എന്തെങ്കിലും ആശാരിപണി ചെയ്യിക്കാനുണ്ടോ?”

“ഉണ്ട്” എന്ന് മൂത്ത സഹോദരൻ മറുപടി പറഞ്ഞു. “ആ കാണുന്ന ചെറിയ പുഴയിടുക്കിൻറെ അപ്പുറത്ത് എൻറെ അയൽക്കാരനാണ്, സത്യത്തിൽ അയാൾ എൻറെ ചെറിയ സഹോദരനാണ്, കഴിഞ്ഞ ആഴ്ച ഞങ്ങൾ തമ്മിൽ വഴക്കുണ്ടായി, അവൻ പുഴയോരത്ത് ബുൾഡോസർ കൊണ്ട് ഇടിച്ചു താഴ്ത്തുകയും അങ്ങിനെ അവിടെ ഒരു പുഴയിടുക്ക് ഉണ്ടാവുകയും ചെയ്തു. എന്നെ അകറ്റി നിർത്താനാവും അവൻ ഇതു ചെയ്തത്, പക്ഷെ ഞാനും ഒരു പണി കണ്ടുവെച്ചിട്ടുണ്ട്. ആ കളപ്പുരക്കടുത്ത് കൂട്ടിയിട്ട പഴയ സാധനങ്ങൾ നീ കാണുന്നില്ലേ, അതുകൊണ്ട് 8 അടി ഉയരത്തിൽ നീ ഒരു മതിൽ കെട്ടണം, പിന്നെ എനിക്ക് അവനെയും അവൻറെ സ്ഥലവും ഒന്നും കാണണ്ടല്ലോ”.

ആശാരി പറഞ്ഞു, “എനിക്ക് കാര്യങ്ങൾ മനസ്സിലായി, നിങ്ങൾക്ക് ഇഷ്ടമുള്ള രീതിയിൽ ഞാൻ ജോലിചെയ്യാം”. മൂത്ത സഹോദരൻ ആശാരിക്ക് പണിക്ക് ആവശ്യമുള്ള സാധനങ്ങൾ എല്ലാം ഏർപ്പാട് ചെയ്തു, എന്തോ കാര്യത്തിനായി പട്ടണത്തിലേക്ക് പോയി.

ആശാരി ദിവസം മുഴുവനും നല്ലവണ്ണം ജോലിചെയ്തു. അളന്നും, മുറിച്ചും, ആണി അടിച്ചും അയാൾ ജോലി പൂർത്തിയാക്കി. വൈകുന്നേരം ജോണ് തിരിച്ചുവന്നപ്പോൾ അയാളുടെ കണ്ണുകൾ മലർക്കെ തുറന്നു, അയാൾ അന്ധാളിച്ചു, അയാളുടെ പുരികം ചുളിഞ്ഞു; കാരണം അവിടെ ഒരു മതിലിനു പകരം ഒരു പാലമായിരുന്നു. രണ്ടു കൃഷിയിടങ്ങളെ തമ്മിൽ ബന്ധിപ്പിക്കുന്ന ഒരു പാലം! വളരെ വൃത്തിയായി പണിഞ്ഞ നല്ല മനോഹരമായ കൈപ്പിടികൾ ഒക്കെയുള്ള ഒരു പാലം. അവർ അത് നോക്കിനില്ക്കെ തന്നെ ജോണിൻറെ ഇളയ സഹോദരൻ അയാളുടെ അടുത്തേക്ക് ആലിംഗനം ചെയ്യാൻ എന്നപോലെ കൈകൾ നീട്ടികൊണ്ട് വന്നു.
എന്നിട്ട് പറഞ്ഞു, ” ഞാൻ പറഞ്ഞതും ചെയ്തതും എല്ലാം ക്ഷമിച്ച് ചേട്ടൻ ഒരു പാലം പണിയിച്ചുവല്ലോ. എന്നോട് ക്ഷമിക്കു” .

പാലത്തിൻറെ രണ്ടറ്റത്തും നിന്നിരുന്ന സഹോദരന്മാർ പാലത്തിൻറെ നടുവിൽ ഒരുമിച്ചുനിന്ന് സ്നേഹം കൈമാറി. അവർ തിരിഞ്ഞുനോക്കിയപ്പോൾ കണ്ടത്, തന്റെ പണിആയുധങ്ങളുമായി സ്ഥലം വിടാൻ ഒരുങ്ങുന്ന ആശാരിയെയാണ്. മൂത്ത സഹോദരൻ പറഞ്ഞു “നിൽക്കു പോകരുത്, എനിക്ക് കുറച്ചു ദിവസത്തെകൂടി ജോലി നിങ്ങളെകൊണ്ട് ചെയ്യിക്കാനുണ്ട്.

ആശാരി പറഞ്ഞു “എനിക്ക് ഇവിടെ നിൽക്കാൻ ഇഷ്ടമേ ഉള്ളു. പക്ഷെ എനിക്ക് ഇതുപോലെ ഒരുപാട് പാലങ്ങൾ ഇനിയും പണിയേണ്ടതായിട്ടുണ്ട്”.

ഗുണപാഠം

ഒരു സ്നേഹബന്ധം തകർക്കാൻ വളരെ എളുപ്പമാണ്,പക്ഷെ ഒന്ന് കെട്ടിപ്പടുക്കുവാൻ വളരെ പ്രയാസവും. ഒരാൾ തനിക്ക് മറ്റുള്ളവരിൽ നിന്നും കിട്ടുന്ന സ്നേഹം ആസ്വദിക്കണം. ബന്ധങ്ങളിൽ ഉയർച്ച താഴ്ച്ചകൾ ഉണ്ടാവാം.പക്ഷെ നമ്മൾ ആ ബന്ധത്തിൻറെ വില മനസ്സിലാക്കണം. നമ്മുടെ അഹങ്കാരവും ശത്രുതയും ഒരു ചെറിയ പ്രശ്നത്തെപ്പോലും വലുതായികണ്ട് തെറ്റായ തീരുമാനം എടുക്കാൻ നമ്മെ പ്രേരിപ്പിക്കും, അതുകൊണ്ട് സമയമെടുത്ത് ആലോചിച്ച് എല്ലാ തെറ്റിധാരണകളും തീർത്താൽ നമുക്കും മറ്റുള്ളവർക്കും സന്തോഷമുണ്ടാകും. നമുക്കിടയിൽ മതിലുകൾക്ക് പകരം നമുക്ക് പാലങ്ങൾ പണിയാം.

നിങ്ങൾ ഏതുതരം കാറാണ് ഉപയോഗിക്കുന്നത് എന്നല്ല പക്ഷെ എത്രപേരെ നിങ്ങൾ അവർക്ക് എത്തേണ്ടിടത്ത് എത്തിച്ചു എന്നാണ് പ്രസക്തം

നിങ്ങളുടെ വീട് എത്ര ചെറുതോ വലുതോ ആകട്ടെ, എത്ര ആളുകളെ നിങ്ങൾ അവിടേക്ക് ക്ഷണിച്ചിട്ടുണ്ട് എന്നതാണ് പ്രസക്തം.

നിങ്ങളുടെ അലമാരിയിൽ എത്ര വസ്ത്രങ്ങൾ ഉണ്ട് എന്നതല്ല, നിങ്ങൾ എത്രപേർക്ക് വസ്ത്രങ്ങൾ നൽകിയിട്ടുണ്ട് എന്നതാണ് പ്രസക്തം.

നിങ്ങൾക്ക് എത്ര സുഹൃത്തുക്കൾ ഉണ്ട് എന്നല്ല, മറിച്ച് എത്രപേർ നിങ്ങളെ സുഹൃത്തായി കാണുന്നുണ്ട് എന്നതാണ് പ്രസക്തം.

നിങ്ങൾ ഏതുതരം അയൽപക്കത്താണ് ജീവിക്കുന്നത് എന്നല്ല, നിങ്ങളുടെ അയൽക്കാരനോട് നിങ്ങൾ എങ്ങിനെ പെരുമാറുന്നു എന്നതാണ് പ്രസക്തം.

നിങ്ങളുടെ തൊലിയുടെ നിറമല്ല, പക്ഷെ നിങ്ങളുടെ സ്വഭാവം എങ്ങിനെ എന്നതാണ് പ്രസക്തം.

Advertisements

ക്ഷമിക്കുന്നതു ഉത്തമം, മറക്കുന്നത് അതിഉത്തമം – Good to forgive, best to forget

 

isaac-newton

ന്യൂട്ടണ്‍

മൂല്യം        : സ്നേഹം, ക്ഷമ

ഉപമൂല്യം : അനുകമ്പ

 

പ്രസിദ്ധ ശാസ്ത്രഞ്ജൻ സർ ഐസക്‌ ന്യൂട്ടൻ, 20 വർഷങ്ങളോളം ദിവസവും മണിക്കുറുകൾ ചിലവിട്ട് കഠിന പ്രയത്നം ചെയ്തു തന്റെ മഹത്തായ കണ്ടുപിടിതത്തിന്റെ ഫലം എഴുതി തയ്യാറാക്കി. ഈ കടലാസുകൾ മേശപുറത്തുവെച്ച് അദ്ദേഹം പുറത്തു ഉലാത്തുവാൻ പോയി. അദ്ദേഹത്തിൻറെ ഡയമണ്ട് എന്ന് പേരുള്ള വളർത്തുനായ മുറിയിൽ കിടക്കുകയായിരുന്നു. കുറച്ചുനേരം കഴിഞ്ഞപ്പോൾ അത് മേശപുറത്തേക്കക്ക്ചാടി, അത് കാരണം കത്തികൊണ്ടിരിക്കുന്ന മെഴുകുതിരി തയ്യാറാക്കി വെച്ചിരുന്ന കൈഎഴുത്ത്പ്രതിയിലേയ്ക്ക് വീഴുകയും, ആ കടലാസ്സുകൾക്ക് തീ പിടിക്കുകയും ചെയ്തു. 20 വർഷത്തെ പരീക്ഷണഫലം,നിമിഷങ്ങൾക്കകം വെന്തു വെണ്ണീറായി. മുറിയിൽ തിരിച്ചെത്തിയപ്പോൾ ന്യൂട്ടൻ പകച്ചു പോയി.അദ്ദേഹത്തിൻറെ വിലപ്പെട്ട കടലാസുകൾ വെറും ഒരുപിടി ചാരമായി മാറിയിരിയ്ക്കുന്നു. ന്യൂട്ടണ്‍ നായയെ അടിച്ചില്ല. വേറെ ആരെങ്കിലും ആയിരുന്നെങ്ങിൽ നായയെ അടിച്ചു കൊല്ലുമായിരുന്നു; പക്ഷെ ന്യൂട്ടൻ നായയുടെ തലയിൽ തട്ടിക്കൊണ്ടു അതിനെ ദീനമായി നോക്കി പറഞ്ഞു “ഡയമണ്ട് നീ എന്താണ് ചെയ്തതെന്നു നിനക്ക് അറിയില്ല”.

അദ്ദേഹം പിന്നെയും എഴുതി തുടങ്ങി. ആ പ്രവർത്തി തീർക്കുവാൻ അദ്ദേഹത്തിന് വർഷങ്ങൾ തന്നെ വേണ്ടി വന്നു. ആ ബധിരനായ നായയോടുള്ള അദ്ദേഹത്തിന്റെ അനുകമ്പ എത്രമാത്രം വലുതായിരുന്നു! ന്യൂട്ട‍ന്റെ ഹൃദയവും അദ്ദേഹത്തിന്റെ ബുദ്ധിയോളം വലുതായിരുന്നു.

ഗുണപാഠം
ആരെങ്കിലും നമ്മളോട് തെറ്റു ചെയ്താൽ മാപ്പ് കൊടുക്കുവാൻ വലിയ വിഷമമാണ്, പക്ഷെ ദൃഡനിശ്ചയം ഉണ്ടെങ്കിൽ അത് സാധ്യവും ആണ്. സംഭവിച്ചതെല്ലാം മറക്കണമെങ്കിൽ നിരന്തര ശ്രമങ്ങളും ഹൃദയനൈർമല്യവും വേണം. മറക്കാനും പൊറുക്കുവാനും ഉള്ള ശീലം വളർര്ത്തുകയാണെങ്കിൽ, ഈ ലോകത്തിൽ നിങ്ങൾക്ക് ശത്രുക്കൾ ഉണ്ടാവുകയില്ല. നിങ്ങൾ എല്ലാവരുമായി ചങ്ങാത്തം സ്ഥാപിക്കുകയും ചെയ്യും. വിദ്വേഷം വളർത്ത)തിരിക്കൂ, പ്രേമം വളർത്തൂ. എല്ലാവരെയും സ്നേഹിക്കൂ.

http://saibalsanskaar.wordpress.com

invention

പ്രേമം വളർത്തു, വിദ്വേഷം അകറ്റൂ – Develop love , discard hate

develop-love

ഉപമൂല്യം : ക്ഷമ, സഹിഷ്ണുത

 മൂല്യം : ശരിയായ പ്രവർത്തി, ആചാരം

ഒരു അദ്ധ്യാപിക തന്റെ ക്ലാസ്സിലെ കുട്ടികളെ ഒരു പുതിയ കളി പഠിപ്പിക്കുവാൻ തീരുമാനിച്ചു.

അതിനായി, അവർ ഓരോ കുട്ടികളോടും ഒരു പ്ലാസ്റ്റിക് സഞ്ചിയിൽ കുറച്ചു ഉരുളക്കിഴങ്ങുകൾ കൊണ്ടുവരാൻ പറഞ്ഞു.

ഓരോ ഉരുളക്കിഴങ്ങിനും കുട്ടി വെറുക്കുന്ന ഒരു വ്യക്തിയുടെ പേര് കൊടുക്കണമെന്ന് അദ്ധ്യാപിക പറഞ്ഞു. അതായത്, ഓരോ കുട്ടിയുടെ സഞ്ചിയിലും ഉള്ള ഉരുളകിഴങ്ങിന്റെ എണ്ണം അവനോ അതോ അവളോ വെറുക്കുന്ന വ്യക്തികളുടെ സംഖ്യക്ക് തുല്യമായിരിയ്കണം.

പിറ്റേദിവസം എല്ലാ കുട്ടികളും അവനോ, അവളോ വെറുക്കുന്ന ആൾക്കാരുടെ പേരെഴുതിയ ഉരുളകിഴങ്ങുസഞ്ചിയുമായി സ്കൂളിൽ എത്തി. ചിലരുടെ കയ്യിൽ രണ്ടു ഉരുളകിഴങ്ങും മറ്റുചിലരുടെ കയ്യിൽ മൂന്നും കുറച്ചു കുട്ടികളുടെ കയ്യിൽ അഞ്ചും ഉരുളക്കിഴങ്ങുകൾ ഉണ്ടായിരുന്നു.

അദ്ധ്യാപിക കുട്ടികളോട് പറഞ്ഞു, “നിങ്ങൾ എവിടെ പോകുമ്പോഴും, ടോയിലറ്റിൽ ആയാൽ പോലും, ഈ ഉരുളകിഴങ്ങുസഞ്ചി കൂടെ കൊണ്ടുപോകണം; ഒരാഴ്ച ഇങ്ങനെ ചെയ്യണം”.

ദിവസങ്ങൾ ഓരോന്നായി കടന്നുപോയി. ചീഞ്ഞ ഉരുളകിഴ്ങ്ങിന്റെ ദുർഗന്ധം കാരണം കുട്ടികൾ പരാതിപ്പെടാൻ തുടങ്ങി. അതുമാത്രമല്ല അഞ്ചു ഉരുളക്കിഴങ്ങുകൾ കയ്യിലുള്ള കുട്ടികൾക്ക് ഭാരമേറിയ സഞ്ചി ചുമക്കേണ്ടതായും വന്നു. ഒരാഴ്ച കഴിഞ്ഞപ്പോൾ കുട്ടികൾക്ക് ആശ്വാസമായി, ഒരു വിധം കളി അവസാനിച്ചുവല്ലോ.

അദ്ധ്യാപിക കുട്ടികളോട് ചോദിച്ചു, “ഒരാഴ്ച ഉരുളകിഴങ്ങുസഞ്ചി കൂടെ കൊണ്ടുനടന്നപ്പോൾ നിങ്ങൾക്ക് എന്ത്തോന്നി?”
ഒരാഴ്ച മുഴുവനും, ദുർഗന്ധം വമിക്കുന്ന ഭാരമേറിയ ഉരുളകിഴങ്ങുസഞ്ചി, പോകുന്നിടത്തെല്ലാം തൂക്കി നടന്നതിന്റെ മടുപ്പും പ്രയാസങ്ങളും എല്ലാം കുട്ടികളും അദ്ധ്യാപികയോട് പരാതിപ്പെട്ടു.

അപ്പോൾ അദ്ധ്യാപിക കുട്ടികളോട് ഈ കളിയുടെ പിന്നിലുള്ള രഹസ്യം പറഞ്ഞു, “നിങ്ങൾ ആരോടെങ്കിലും ഹൃദയത്തിൽ വിദ്വേഷം വെച്ചു പുലർത്തുകയാണെങ്കിൽ നിങ്ങളുടെ സ്ഥിതിയും ഇതുതന്നെയാണ്. വെറുപ്പിന്റെ ദുർഗന്ധം നിങ്ങളുടെ ഹൃദയത്തെ മലിനമാക്കുകയും നിങ്ങൾ എവിടെപോകുബോഴും അത് നിങ്ങളെ പിന്തുടരുകയും ചെയ്യും. ചീഞ്ഞ ഉരുളകിഴ്ങ്ങിന്റെ ദുർഗന്ധം ഒരാഴ്ചപോലും സഹിക്കാൻ കഴിയാത്ത നിങ്ങൾ എങ്ങിനെ ഒരായുഷ്കാലം മുഴുവൻ ഹൃദയത്തിൽ വെറുപ്പിന്റെ ദുർഗന്ധം വഹിച്ച് ചിലവഴിക്കും??? ഒന്ന് ആലോചിച്ചുനോക്കു. ”

hate-symbol
.

ഗുണപാഠം

നിങളുടെ ഹൃദയത്തിൽ ആരോടെങ്കിലും വിദ്വേഷംഉണ്ടെങ്കിൽ അത് ഉപേക്ഷിക്കൂ, അങ്ങിനെ നിങ്ങൾ ഒരു ആയുസ്സ് മുഴുവനും പാപം ഉള്ളിൽകൊണ്ട് നടക്കുന്നില്ല; മറ്റുള്ളവർക്ക് മാപ്പ് കൊടുക്കുന്നതാണ് ഏറ്റവും നല്ല മനോഭാവം!

ശരിയായ സ്നേഹം പരിപൂർണനായ വ്യക്തിയെ സ്നേഹിക്കുന്നതിലല്ല, പക്ഷെ അപൂർണനായ വ്യക്തിയെ പരിപൂർണമായി സ്നേഹിക്കുന്നതിലാണ്.

ഇതേ കഥകൾ മറ്റു ഭാഷകളിലും വായിക്കാം

http://saibalsanskaar.wordpress.com
http://saibalsanskaartamil.wordpress.com
http://saibalsanskaartelugu.wordpress.com
http://saibalsanskaarhindi.wordpress.com